Monday, July 9, 2012

သတင်းထောက်တစ်ဦး၏ မှတ်စု(၄)

ခင်ဗျားလည်းချစ်သူရှိနိုင်တာပဲ။ သူလည်းချစ်သူရှိနေနိုင်တယ်။ ခင်ဗျားလည်းချစ်နေတဲ့သူရှိနေနိုင်သလို။ အားလုံးလည်းချစ်နေတဲ့သူ၊ ချစ်ရမယ့်သူရှိနေနိုင်တာပေါ့။ ဒါပေမယ့် ကျွန်တော်တို့ သတင်းထောက်တွေကျတော့ ချစ်ရေးချစ်ရာဆိုတာတော်တော်ပြောရခက်တဲ့ကိစ္စဗျ။

သတင်းထောက်တစ်ယောက်ရဲ့ရည်းစားဖြစ်ရတာ၊ သတင်းထောက်တစ်ယောက်နဲ့ ချစ်သူဖြစ်ရတာ၊ သတင်းထောက်တစ်ယောက် ရည်စားထားရတာတော်တော်ဒုက္ခရောက်ပါတယ်။ ကျွန်တော်တို့အရင် စီနီယာသတင်းထောက်ကြီးတွေဆိုလည်းတော်တော်ဒုက္ခရောက်ကြပါတယ်။ မိန်းမရနေတဲ့ အစ်ကိုသတင်းထောက်တွေဆိုလည်းသူတို့မိန်းမတွေနဲ့ တော်တော်လေးအဆင်ပြေအောင် နေကြရတာဗျ။

ဘာလို့လဲလို့ ခင်ဗျားတို့ကမေးမယ်။ သတင်းထောက်တွေကသာမန်လူတွေ မဟုတ်ကြလို့လား။ အခွင့်ထူးခံလူတန်းစားတွေလား။ ဘယ်လိုဟာတွေလည်းလို့ ပြန်ပြောကြမယ်ထင်တယ်။

တစ်ခုမှ မဟုတ်ပါဘူး။ သတင်းထောက်တွေဆိုတာလည်းသာမန်လူတွေပါပဲ။ ဒါဆိုဘာကြောင့် ချစ်ရေးချစ်ရာမှာအဆင်မပြေကြတာလဲ။

သတင်းထောက်ကို ပြည်သူတွေပိုင်တယ်။ သတင်းထောက်ရဲ့အသက်ဟာ ပြည်သူတွေလက်ထဲမှာ။ သတင်းထောက်ဆိုတာဘယ်သူနဲ့မှ ငြိစွန်းတဲ့သူတွေ မဟုတ်ဘူး။ အဲဒီလိုကြီးကြီးကျယ်ကျယ်တွေပြောတာ ကြားဖူးပါလိမ့်မယ်။ သဘောတူရင်လည်းတူပေါ့လေ။ မတူရင်လည်း…။

ကျွန်တော့်ရဲ့ ကိုယ်ပိုင်အမြင်ကတော့ သတင်းထောက်ကိုသတင်းတွေကပိုင်တယ်။ သတင်းတွေကိုသတင်းထောက်ကချစ်ရတယ်။ သတင်းကိုသတင်းထောက်ကသစ္စမဖောက်ရဘူး။ သတင်းတွေအပေါ်ကျောသားရင်သားမခွဲခြားရဘူး။ အဲဒီလိုမြင်ပါတယ်။
ဒီလိုသာမန်သတင်းထောက်တွေကဘာလို့ချစ်ရေးချစ်ရာမှာအဆင်မပြေဖြစ်ကြရတာလဲ။

ခြုံပြီးပြောရင်ရတဲ့ အဖြေကတော့ သတင်းထောက်တွေဟာအချိန်ကိုမပိုင်ပါဘူး။ အချိန်မရှိပါဘူး။ အိမ်မပြန်ဘဲသတင်းရှိတဲ့နေရာမှာအိပ်ရတဲ့ ရက်တွေကလည်းမနည်းဘူးလေ။ နောက်ပြီးတော့ သတင်းထောက်တွေဟာပုံမှန်အားဖြင့် ငွေရေး၊ ကြေးရေးမှာချို့တဲ့ကြပါတယ်။ အဲဒါတွေကချစ်ရေးချစ်ရာတွေမှာအဆင်မပြေရတဲ့ အကြောင်းတွေပါပဲ။

ဥပမာသတင်းထောက်တစ်ယောက်ဟာသူကြိုက်နေတဲ့ (သတင်းလောက, က မဟုတ်တဲ့ အပြင်က) ကောင်မလေးတစ်ယောက်နဲ့ ချိန်းထားတယ်ဆိုပါစို့။ အဲဒီမှာတင် ပြဿနာနည်းနည်းရှိပါတယ်။ သူချိန်းတဲ့အချိန်ဟာသူကြိုက်နေတဲ့ကောင်မလေးပါးစပ်ကပြောသလိုဖြစ်တဲ့ အချိန်မဟုတ်ပါဘူး။ ရုံးချိန်ရယ်၊ စာမူပိတ်ချိန်၊ ဖောင်ပိတ်ချိန်၊ ပွဲတွေ၊ အင်တာဗျူးတွေနဲ့လွတ်တဲ့အချိန်နဲ့ကိုက်ညီမှ အဲဒီသတင်းထောက်အတွက် အဆင်ပြေပါလိမ့်မယ်။ စာမူခထုတ်တဲ့နေ့လည်း ဖြစ်ရပါဦးမယ်။ အဲ…ဖောင်ပိတ်မယ့်နေ့မှ ကောင်မလေးကအဖြေပေးမယ်ဆိုရင်တော့ သေမယ်သာကြံတော့။

ကျွန်တော်တို့ ပြည်တွင်းဂျာနယ်တွေမှာအကြမ်းအားဖြင့် စိစစ်ရေးကိုစာမူတင်ရတာ ပ-မူနဲ့ ဒု-မူဆိုပြီးတော့ နှစ်ပိုင်းရှိပါတယ်။ ဆောင်းပါးတွေ၊ သတင်းဆောင်းပါးတွေ၊ ကျန်းမာရေးသတင်းတွေ၊ အစည်းအဝေးသတင်းတွေ၊ ပညာရေးသတင်းတွေ၊ အထူးသဖြင့် မသိုးတဲ့သတင်းတွေ(ဘယ်အချိန်အဲဒီသတင်းကိုဖတ်ဖတ် update ဖြစ်နေမယ့်သတင်းမျိုးတွေ) ကိုပ-မူမှာအဓိကဦးစားပေးအနေနဲ့ ထည့်ရပါတယ်။ ဒု-မူကျတော့ ကိုယ့်ဂျာနယ်ထွက်မယ့်ရက်နဲ့ အနီးစပ်ဆုံးရက်တွေမှာ ဖြစ်တဲ့ သတင်းတွေ၊ အထူးသဖြင့် Breaking News တွေကိုအဓိကထည့်ရပါတယ်။ နောက်တစ်မျိုးပြောရရင်တော့ မျက်နှာဖုံးတက်နိုင်မယ့် သတင်းမျိုးတွေပေါ့ဗျာ။

ဒု-မူမှာဆောင်းပါးတို့၊ သတင်းဆောင်းပါးတို့၊ မပါတော့ပါဘူး။ နောက်ဆုံးဒု-မူမှာပါ မမှီလို့ ကျန်ခဲ့တဲ့ သတင်းတွေကိုတော့ “A4 လိုက်တယ်” ဆိုတာရှိပါတယ်။ A4 စာရွက်ကလေးမှာသတင်းတွေကိုထက်,အောက်စီပြီးတော့ စိစစ်ရေးကိုတင်ရတာပါ။ အဲဒီ A4 တင်ပြီးရင်တော့ ဘယ်လောက်ကောင်းတဲ့သတင်းဖြစ်ဖြစ် တင်လို့မရပါဘူး။ ဒါပေမယ့် သတင်းကလည်းကောင်းနေတယ်၊ စိစစ်ရေးတင်ရင် ထိနိုင်တယ်ဆိုရင် တစ်ချို့ အယ်ဒီတာတွေကစိစစ်ရေးမတင်ဘဲ Print လေ့ရှိပါတယ်။ (နောက်ရက်မှာတော့ အယ်ဒီတာနှင့်အဖွဲ့ကပျော်ပျော်ပါးပါးကြီးလက်မှတ်သွားထိုးပြီတော့။ နောက်တစ်ခါ မလုပ်တော့ပါဘူးပေါ့။ဒါပေမယ့် လုပ်တာပဲ။ နောက်တစ်ခါ လက်မှတ်လည်းထိုးရတာပဲ။ ဒါပေမယ့် နည်းနည်းများလာပြီဆိုရင်တော့ လေးပတ်တို့၊ နှစ်လတို့ ပိတ်တာတွေ ဖြစ်ကုန်ရော။)

အဲဒီဒု-မူတင်တဲ့နေ့ကတော့ ကျွန်တော်တို့ရဲ့ ဖောင်ပိတ်ရက်ပေါ့ဗျာ။ တိုက်တစ်ခုနဲ့တစ်ခုမတူတာလေးတွေ၊ အနည်းငယ်တော့ရှိပါတယ်။ ကျွန်တော်ပြောတာကဂျာနယ်တွေ အများဆုံးလုပ်လေ့ရှိတဲ့ပုံစံလေးတွေပါ။အဲဒီ(ဒု-မူနဲ့ A4)တင်တဲ့နေ့ကတော့ အယ်ဒီတာတွေ၊ သတင်းထောက်တွေအလုပ်တွေကိုအသေအကြေ ဖြတ်ရတဲ့နေ့ပေါ့ဗျာ။ အဲဒီနေ့မှာသတင်းတွေလည်းအပြီးတင်ရမယ်၊ စာမူခကဂျာနယ်ထွက်တဲ့နေ့မှရတာလေ။

အဲဒီလိုအကြောင်းကြောင်းတွေကြောင့် သတင်းထောက်တစ်ယောက်ရည်စားရပြီဆိုရင် အဲဒီကောင်ဟာတော်တော်ကံထူးတဲ့ကောင်ပါပဲ။ (တစ်ခုတော့ရှိတယ် သတင်းလိုက်နေရင်းကိုဗူးနေတဲ့ ဗူးသတင်းထောက်တွေလည်းအများကြီးပေါ့ဗျာ။)

အဲဒီလိုသတင်းထောက်တစ်ယောက် ရည်းစားရသွားတယ်ဆိုပါစို့ဗျာ။ ကောင်မလေးနဲ့ချိန်းပြီဆိုရင် ကောင်မလေးကသတိရလို့ လာတွေ့ပါဦးတို့၊ ဘာတို့မရဘူး။ မနက်ခြောက်နာရီလောက်ထ၊ကောင်မလေးအိမ်ရှေ့မှာသွားစောင့်ပြီးပန်းစည်းပေးဖို့ အချိန်မရှိပါဘူး။ ကော်ဖီဆိုင်မှာထိုင်ပြီးအတူတူ ကြည်နှုးဖို့ ဝေလာဝေးပေါ့။ အဲဒီသတင်းထောက်အားတဲ့အချိန်၊ သတင်းတွေပါးတဲ့အချိန်နဲ့ ဂျာနယ်ထွက်တဲ့နေ့နဲ့လည်းကြုံတယ်၊ ကောင်မလေးလည်းအားတဲ့အချိန်ဆုံပြီဆိုရင်တော့ အတိုင်းထက်အလွန်ပေါ့ဗျာ။

မဖြစ်စလောက်နဲ့ ကျွန်တော်ကောင်မလေးတစ်ယောက်ရဖူးပါတယ်။ သူက ILBC က CT (Class Teacher) ဆိုလားပဲ။ သူ့ရာထူးလဲသေသေချာချာမမှတ်မိတော့ပါဘူးဗျာ။
အဲဒီကောင်မလေးနဲ့ချစ်သူဖြစ်ပြီး နှစ်ရက်အကြာမှာ၈၈ ကျောင်းသားတွေ(မင်းကိုနိုင်၊ ကိုကိုကြီးတို့အပါအဝင်)ထောင်ကလွတ်တယ်ဗျာ။ တိုက်တိုက်ဆိုင်ဆိုင် အဲဒီနေ့ကလည်းကောင်မလေးရဲ့မွေးနေ့။ သူကမင်းကိုနိုင်တွေ၊ ဘာတွေ ဂရုမစိုက်ဘူး။ သူ့မွေးနေ့မနက် ၅:၃၀ မှာသူ့အဆောင်ကိုလာပြီးချောကလက်ကျွေးရမယ်တဲ့။သူကအဲဒီအချိန်မှာမွေးတာတဲ့ဗျာ။သွားရော။ ဘယ်လိုဖြစ်နိုင်မှာလဲ။

၈၈ တွေ လွတ်မယ်ဆိုတော့ မလွတ်ခင်ညတစ်ညလုံးကင်မရာအသင့်ပြင်၊ ရီကော်ဒါအားသွင်း(အဲဒီအချိန်တုန်းက ကျွန်တော့်မှာရုံးကပေးထားတာလေးတွေ ရှိနေပါပြီ)။ နောက်ပြီးအရင်က၈၈ တွေရဲ့ထောင်ကျခဲ့ဖူးတဲ့ ရက်စွဲတွေ၊ ပုဒ်မတွေ၊ ရှေ့နေနာမည်တွေပြန်စု၊ နိုင်ငံခြားသတင်းတွေဌာတွေရဲ့ ထင်မြင်ချက်တွေ၊ တစ်ခြားအဖွဲ့အစည်းတွေရဲ့ ၈၈တွေကိုကြိုဆိုမယ့် လှုပ်ရှားမှုတွေ၊ တစ်ညလုံးစောင့်ကြည့်နေရတာပေါ့ဗျာ။ ၈၈ တွေရဲ့ မိသားစုတွေကိုဖုန်းဆက်။ ဘယ်သူကဘယ်ကိုသွားမလဲပေါ့။ တစ်ချို့(ကျွန်တော်ကြုံခဲ့တာတစ်ခုကကိုလှမျိုးနောင်ရဲ့ မိသားစုပါ။ ကျွန်တော်ဖုန်းဆက်တော့ တစ်မိသားစုလုံးဝမ်းသာနေကြလွန်းလို့ တစ်ယောက်မှ စကားမပြောနိုင်ကြပါဘူး၊ ကျွန်တော်လည်းအဲဒီအချိန်မျိုးမှာမမေးတော့ပါဘူး၊ လွတ်မယ်ဆိုတာသေချာအောင် အတည်ပြုပြီးတော့ ဖုန်းချလိုက်ပါတယ်။)ရှာသင့်တဲ့ အချက်အလက်တွေအကုန်ရှာ၊ ကျောင်းသားခေါင်းဆောင်တွေကိုအခွင့်သင့်ရင် မေးလို့ရမယ့် မေးခွန်းတွေကိုအယ်ဒီတာနဲ့တိုင်ပင်၊ အကြံညဏ်တောင်းရသေးတယ်။

[ဒီလိုမျိုးအရေးကြီးတဲ့ ပုဂ္ဂိုလ် (Public Figure) တစ်ယောက်ကတစ်ခုခု (တစ်နေရာရာက ပြန်လာတာ၊ သတင်းစာရှင်းလင်းပွဲလုပ်ဖို့ မဖြစ်နိုင်တဲ့အချိန်) အဲဒီလိုအခါမျိုးတွေမှာသတင်းထောက်တွေကခံစားချက်ကိုဦးစားပေးပြီးမေးခွန်းတွေကိုအဓိကမေးလေ့ရှိပါတယ်။ နောက်ပြီးတော့ သူနဲ့ပတ်သက်တဲ့ အပြင်မှာလောလောဆယ်ဖြစ်ပျက်နေတဲ့ ကောလာဟလလိုကိစ္စမျိုးတွေကိုမေးရပါတယ်။ သူ(အမေးခံရသူ) ဖြေရှင်းပြီးဖြေရမယ့်(အချိန်ယူဖြေရမယ့်)မေးခွန်းမျိုးတွေ သွားမေးရင်တော့ ဝေ့လည်ကြောင်ပတ် အဖြေတွေပဲရတတ်ပါတယ်။ ချက်ချင်းဖြေလေ့ဖြေထလဲမရှိပါဘူး။ ဒါပေမယ့် (ပြန်ကြားရေးဝန်ကြီးဦးကျော်ဆန်းတို့လိုအချိန်ရရ၊ မရရဝေ့လည်ကြောင်ပတ်လုပ်တတ်တဲ့သူတွေကတော့ ချွင်းချက်ပေါ့ဗျာ။)
လက်တန်းဖြေနိုင်မယ့် မေးခွန်းမျိုးတွေ ကျွန်တော်တို့ ရွေးပြီးမေးရပါတယ်။

တစ်ခုရှိသေးတာကအဲဒီလိုအပြေးအလွှားမေးခွန်းတွေ မေးနေတုန်းတစ်ခြားသတင်းထောက်တွေ သိထားပြီးတဲ့ မေးခွန်းမျိုး၊ ဒီလိုအချိန်မျိုးမှာမမေးသင့်တဲ့ မေးခွန်းမျိုးသတင်းထောက်တစ်ယောက်ယောက်ကမေးမိရင်တော့၊ အချင်းချင်းအဟားခံရပါတယ်၊ ဒါတောင် မသိဘူးလားဆိုတဲ့ အထာနဲ့ပါ။]
အဲဒီလိုပြင်ဆင်ရင်းနဲ့ တစ်ညလုံးအိပ်ဖို့အချိန်တောင်မရှိပါဘူး။

နောက်နေ့မနက် ၅ နာရီလောက်ကတည်းက အင်းစိန်ထောင်ရှေ့မှာသွားစောင့်နေရတယ်။ ကောင်မလေးကိုဘယ်ကချောကလက်ကျွေးနိုင်ပါ့မလဲဗျာ။ ကျွန်တော့်မှာကိုကိုကြီးတို့၊ မင်းကိုနိုင်တို့ကျွေးမယ့်ချောကလက်ကိုပဲမျှော်နေရတယ်။ ဒီသတင်းကဂျာနယ်ရှေ့ဖုံး(Front Cover) မှာပါမှာကိုးဗျ။ ဘယ်အချိန်ထွက်လာမလဲတစ်မျှော်မျှော်နဲ့ပေါ့။ အင်းစိန်ထောင်ကနေလေယဉ်ကွင်းကိုသွား။ လေယဉ်ကွင်းမှာလေယဉ်နဲ့ပါလာမယ့် ကျောင်းသားခေါင်းဆောင်တွေကိုတစ်နေ့လုံးစောင့်ရတယ်။ လေယဉ်တစ်စီးဆိုက်လာပြီဟေ့ဆိုရင် သတင်းထောက်တွေ တိုးလို့၊ ကြိတ်လို့ပေါ့ဗျာ။ သတင်းထောက် အယောက် ၁၀၀ လောက်ကြားထဲမှာတိုးလို့၊ ဝှေ့လို့။ ပြန်တွေးကြည့်ရင် ပျော်စရာကြီး။
၎ နာရီလောက်မှ ပြီးသွားတယ်။

အဲဒီကနေနောက်ဆုံးမင်းကိုနိုင်ကသူ့အိမ်မှာသတင်းစာရှင်းလင်းပွဲလုပ်မယ်ဆိုတာနဲ့ တောင်ဥက္ကလာမှာရှိတဲ့ သူ့အိမ်ကိုတန်းသွား။ သွားတာကတော့ တစ်ချို့ နာမည်ကြီးပြီး၊ ချမ်းသာတဲ့ ဂျာနယ်တိုက်ကသတင်းထောက်တွေကတော့ ဂျာနယ်တိုက်ကထုတ်ပေးထားတဲ့ ကားတွေနဲ့ တစ်နေရာနေတစ်နေရာကိုသွားကြတယ်။

တစ်ချို့ကျတော့လည်းသတင်းထောက်တွေစုပြီးတက္ကစီငှားပြီးသွားကြတယ်။သတင်းထောက်ဆိုတာကလည်းသတင်းတစ်ခုကြိုသိပြီဆိုရင် အဲဒီသတင်းမဖြစ်ခင်ကတည်းက ကြိုရောက်နေမှ စိတ်ချမ်းသာတာဗျ။ အဲဒီလိုမရှိတဲ့ သတင်းထောက်ကျတော့လည်းသူများကားတွေနဲ့ ကားကြုံလိုက်ပေါ့ဗျာ။(မှတ်မှတ်ရရ ကျွန်တော်ဆိုလေယဉ်ကွင်းမှာတုန်းက မြန်မာပို့စ်ကအစ်ကိုကြီးကျွေးတဲ့ မနက်စာစားပြီး၊ Messenger ဂျာနယ်ကကားနဲ့ ကားကြုံလိုက်ခဲ့တာ)။

တစ်ခုပြောရဦးမယ်ဗျ။ မင်းကိုနိုင်တို့၊ ကိုကိုကြီးတို့ ဒေါ်အောင်ဆန်းစုကြည်တို့ ထောင်ကထွက်လာမှ ဓါတ်ပုံသတင်းထောက်တွေ သူတို့အစွမ်းပြခွင့်ရသလို ကျွန်တော်တို့လိုသတင်းထောက်အသစ်တွေလည်းအတွေ့အကြုံသစ်တွေ အများကြီးရခဲ့ပါတယ်။

ကျွန်တော်ကဒီဘက်မှာထောင်ကထွက်နေတဲ့အချိန်ကောင်မလေးဆီမှာတော့ တစ်ယောက်တည်း ပြည်တွင်းစစ်နှစ်ကြိမ်လောက်ဖြစ်ပြီးနေပြီ။ အဲဒီနေ့ကကောင်မလေးဆီတောင် မရောက်လိုက်ပါဘူး။ ည ၁၁:၃၀ လောက်မှအိမ်ပြန်ရောက်တယ်။ ရောက်တာနဲ့ ဓါတ်ပုံတွေစစ်၊ သတင်းရေးဖို့ပြင်ရတယ်။ဖုန်းလည်းမဆက်ဖြစ်လိုက်ဘူး။
နောက်တစ်ပတ်လောက်ထိကောင်မလေးက ကျွန်တော့်ကိုအကျယ်ချုပ်ချထားတယ်။ ဘာမှလည်းမပြောဘူး။ ဖုန်းဆက်ရင် အင်း၊ဟင့်အင် အဲဒီနှစ်လုံးပဲပြောတယ်။

၈၈ ကျောင်းသားတွေ လွတ်တဲ့သတင်းကလည်းစိစစ်ရေးထိတယ်။ (ခပ်တုံးတုံးဓါတ်ပုံလေး နှစ်ပုံနဲ့ စိစစ်ရေးကပြင်ဆင်၊ ပြုပြင်၊ ဖြတ်တောက်ပြီးသတင်းတိုတိုလေးတစ်ပုဒ်ပဲပါတယ်။ ခဲလေသမျှ သဲရေကျပါပဲ။)
သိပ်မကြာပါဘူးဗျာ။ နှစ်လလောက်ပါပဲ။ ကောင်မလေးလည်းဘယ်ခံနိုင်မလဲ။တစ်လမှာသူနဲ့တွေ့ရတဲ့အချိန်ကသူတို့ ILBC ကျောင်းအားတဲ့ Sunday မှာ ကျွန်တော် သတင်းမရှိပါမှ တွေ့ကြရတာ။

အဲ…သတင်းထောက်ဆိုတာကလည်းသတင်းပေါ်အိပ်၊ သတင်းနားစားဆိုတော့(မြန်မာဗီဒီယိုတွေထဲကလို-“ရှင်…ကျွန်မနဲ့သတင်းဘယ်သူ့ကိုပိုချစ်လဲ”လိုမျိုးမေးခွန်းတွေ ထွက်လာတော့တာပေါ့။ သတင်းထောက်တို့မျက်ရည် မြေမခစတမ်း။ လမ်းခွဲတစ်ခုမှာ ငြိမ်သက်ဆဲကိုယ်စီဒါဏ်ရာများနဲ့ ပေါ့ဗျာ။

ဒါပေမယ့် တစ်ခုတော့ရှိတယ်ဗျ။ သတင်းထောက်တွေဟာသတင်းလောက, က မဟုတ်တဲ့ တစ်ခြားနယ်ပယ်ကလူတွေနဲ့ ချစ်သူဖြစ်ကြလို့သာဒီလိုအခက်အခဲတွေ ကြုံတွေ့ကြရတာပါ။ သတင်းထောက်အချင်းချင်းချစ်သူတွေဖြစ်ကြရင်တော့………။
(ဆက်ဦးမည်)

Sunday, July 8, 2012

သတင်းထောက်တစ်ဦး၏ မှတ်စု(၃)

ဟိုအရင်က ရေးခဲ့တဲ့ ဒိုင်ယာရီဆိုတဲ့ အသုံးအနှုန်းကို မှတ်စု လို့ပြင်လိုက်ပါတယ်။ ဘာဖြစ်လို့လဲဆိုတော့ သတင်းထောက်တွေရဲ့ အသက်ဟာ ဒိုင်ယာရီမဟုတ်ဘဲ သူတို့ရဲ့လက်စွဲတော် မှတ်စုစာအုပ် (Notebook) ဖြစ်နေလို့ပါပဲ။

Reporter’s Notebook
ဘာဖြစ်လို့ သတင်းထောက်တစ်ယောက်ရဲ့ အသက်ဟာ Notebook ဖြစ်နေရသလဲဆိုတော့ အကယ်၍ လူတစ်ယောက်ဟာ(သတင်းထောက်အချင်းချင်းပဲဖြစ်ဖြစ်) သတင်းထောက်တစ်ယောက်ကို ဒုက္ခရောက်စေချင်တယ်ဆိုရင် အဲဒီသတင်းထောက်ရဲ့ Notebook ရယ်၊ ဖုန်းစာအုပ်(ကျွန်တော်တို့အခေါ် Source စာအုပ်) ရယ် နှစ်ခုလုံးကိုသာ ဝှက်ထားလိုက်၊ အဲဒီသတင်းထောက်ဟာ ဘယ်သတင်းမှလိုက်လို့မရအောင် အခက်တွေ့သွားစေပါတယ်။

ဒါကြောင့် သတင်းထောက်တွေဟာ သူတို့ရဲ့ Notebook နဲ့ Source စာအုပ်ကို ဘုရားစာအုပ်ထက် တန်ဖိုးထားတတ်ကြပါတယ်။ ပျောက်သွားရင် ဘယ်တော့မှ ပြန်ဝယ်လို့မရ၊ အစားထိုးလို့လည်းမရ တော့တဲ့အတွက်ပါ။

ဒါပေမယ့် ဒီနေ့ ခေတ်ပေါ်သတင်းထောက်တစ်ချို့ကတော့ ဘယ်လိုဖြစ်တယ်မသိဘူးဗျာ။ ပွဲတစ်ခုမှာ၊ ဒါမှမဟုတ်၊ သတင်းစာရှင်းလင်းပွဲတစ်ခုမှာ တွေ့လိုက်ရင် A4 စာရွက်ကိုခေါက်ပြီး ရေးမှတ်နေတာပဲတွေ့ရပါတယ်။ ကျွန်တော်သတင်းထောက်ဖြစ်စက အဲဒီလိုမျိုးတွေတွေ့ရင်တော်တော်အံ့သြပါတယ်။ ကျွန်တော်တို့ သတင်းထောက်သင်တန်း၊ သတင်းလိုက်နည်းသင်တန်းတွေတုန်းက အဲဒီလိုမျိုးအချက်(စည်းကမ်း)တွေကို ကျွန်တော်တို့ကို သင်ပြပေးတဲ့ဆရာတွေက တိတိကျကျသင်ကြားပေးခြင်းခံထားရတော့ အဲဒီလိုမျိုးတွေမြင်ရင် ကျွန်တော့်အတွက် ဝေခွဲရခက်စေပါတယ်။

ပြီးတော့ အဲဒီလို လုပ်နေတဲ့ သတင်းထောက်တွေဆိုတာဟာလည်း တစ်ခါတစ်လေမှာ ဂျာနယ်တိုက်တစ်တိုက်ရဲ့ တာဝန်ခံအယ်ဒီတာဆိုသူတွေ ဖြစ်နေတတ်ပါတယ်။ အဲဒါဟာ သတင်းထောက်တွေမလုပ်သင့်တဲ့ တော်တော်ဆိုးတဲ့အချက်တစ်ခုပါ။

ကြားဖြတ်ပြီးတစ်ခုပြောချင်ပါသေးတယ်။ မင်းကိုနိုင်တို့၊ ကိုကိုကြီးတို့ လွတ်လာပြီးနောက်ပိုင်း တော်ဝင်စင်တာမှာ ၈၈ မျိုးဆက်ကျောင်းသားများ သတင်းစာရှင်းလင်းပွဲလုပ်တယ်ဆိုတာ ကြားကြပါလိမ့်မယ်။ အဲဒီမှာ မင်းကိုနိုင်တို့၊ ကိုကိုကြီးတို့က အားပါတဲ့ စကားတစ်ခွန်း၊ နှစ်ခွန်းပြောလိုက်ရင် သတင်းထောက်တွေရော၊ အဲဒီပွဲကို ရောက်လာကြတဲ့သူတွေပါ ခဏခဏ လက်ခုပ်တီးကြပါတယ်။ သူတို့ပြောတဲ့ တစ်ချို့ စကားတွေဟာ တကယ်ကောင်းချီးပေးဖို့ကောင်းတဲ့စကားတွေဖြစ်ပါတယ်။

ဒါပေမယ့် သတင်းထောက်ဆိုတာ ဘယ်သူ့ကို ထောက်ခံပြီးတော့၊ ဘယ်သူပြောတာ သဘောကျပြီးတော့ အားပေးခြင်း၊ အောဟစ်ခြင်း၊ လက်ခုပ်တီးခြင်း မလုပ်ရပါဘူး။ တကယ်လို့ အားပေးချင်တယ်၊ လက်ခုပ်တီးခြင်းတယ်ဆိုရင် ကိုယ့်ရဲ့ သတင်းလိုက်ချိန်မဟုတ်တဲ့၊ ကိုယ်ပိုင်အချိန်တွေမှာ၊ တစ်ခြားနေရာတွေမှာသာ ပြုလုပ်နိုင်ပါတယ်။ အဲဒီ (၈၈ မျိုးဆက်သတင်းစာရှင်းလင်းပွဲ) မှာ သတင်းထောက်တွေ လက်ခုပ်တီးတယ်ဆိုတဲ့သတင်းဟာ သတင်းစာ၊ ဂျာနယ် လောက၊ သတင်းထောက်လောက မှာ တော်တော်နာမည်ကြီးသွားပါတယ်။ ဆရာလူထုစိန်ဝင်းတောင် အဲဒါနဲ့ပတ်သက်ပြီး ဆောင်းပါးရေးလိုက်သေးတယ်။

ဒါတွေကို ဒီလိုပြောလို့ ဘယ်စာအုပ်ထဲမှာ ရေးထားလဲ၊ ဘယ်သူက ပြောလဲလို့ပြောရင် ကျွန်တော့်မှာ ဖြေစရာ မရှိပါဘူး။ တိတိကျကျရေးထားတဲ့ စာအုပ်လည်း မရှိပါဘူး။ ဒါပေမယ့် သတင်းထောက်တွေမှာ၊ သတင်းလောကမှာ မပြောဘဲ၊ ရေးမထားဘဲ နားလည်ရမယ့် စည်းကမ်းတွေအများကြီးပါပဲ။ အဲဒါကို သတင်းထောက်တွေ သတင်းလိုက်နေရင်းသာ သင်ယူတတ်မြောက်ကြတာပါ။ ဘယ်သူ့ကိုမှ ဂရုမစိုက်ဘူး၊ သတင်းရေးနေရင်ပြီးရောဆိုတဲ့ သတင်းထောက်တွေလည်း အများကြီရှိပါတယ်။

[ကိုယ့်ပေါင်ကိုယ်လှန်ထောင်းသလို ဖြစ်နေရင်လည်း မတတ်နိုင်တော့ပါဘူး၊ ကျွန်တော်ပြောမိသွားပါပြီ]

ကျွန်တော်တို့ရဲ့ Notebook အကြောင်းကို ဆက်ပါမယ်ခင်ဗျာ။
သတင်းထောက်တွေရဲ့ Notebook တွေထဲမှာ ရက်စွဲတွေ၊ ဖုန်းနံပါတ်တွေ၊ ထင်တာတွေ လျှောက်ရေးထားတာတွေ၊ ပန်းချီပုံတွေ၊ သတင်းအစတွေ၊ပြောစကား (ကျွန်တော်တို့အခေါ်ကုတ်-[Quote]) တွေ၊ အင်တာဗျူးတွေ၊ တစ်ခြားတစ်ခြား စုံစီနဖာတွေနဲ့ ပြည့်နှက်နေတတ်ပါတယ်။

နိုင်ငံတကာရဲ့ အယူအဆ၊ ထုံးတမ်းစဉ်လာအရလည်း သတင်းထောက် ဒါမှမဟုတ် အယ်ဒီတာ ဒါမှမဟုတ် သတင်းစာတိုက်တွေနဲ့ပါတ်သက်ပြီး တရားစွဲဆိုတဲ့ကိစ္စတွေလိုမျိုးမှာ တရားစွဲဆိုခံရတဲ့ သတင်းထောက်ရဲ့ Notebook ကိုသက်သေခံထားပါတယ်။ Notebook ကိုအဓိကထားပြီးကြည့်ပါတယ်။ နောက်ပြီးတော့ သတင်းထောက်ရဲ့ သက်သေခံပစ္စည်းလည်းဖြစ်ပါတယ်။ ဒါပေမယ့် ကျွန်တော်တို့နိုင်ငံမှာတော့ သတင်းထောက်တွေဟာ Notebook ကိုသိပ်ဦးစားမပေးကြပါဘူး။ နောက်ပြီးတော့ သတင်းနဲ့ပါတ်သက်ပြီးတော့လည်း ဒီနေ့ထက်ထိ ထူးထူးခြားခြား တရားစီရင်ခဲ့ရတဲ့ ကိစ္စတွေလည်းမရှိတော့ Notebook ဟာ အရောင်ညိုးနွမ်းနေပါတော့တယ်။

သတင်းထောက်တွေ အခက်တွေ့ရတဲ့ ကိစ္စတစ်ခုအကြောင်းလည်းပြောချင်ပါတယ်။ ဖုန်းနဲ့သတင်းလိုက်တာပါ။
သတင်းလိုက်တဲ့အခါ ဖုန်းနဲ့လိုက်ရတဲ့အခါတွေလည်းရှိပါတယ်။ ဖုန်းနဲ့သတင်းလိုက်တာကို သဘောမကျကြတဲ့သူတွေ(စာဖတ်ပရိတ်သတ်တွေ) လည်း ရှိပါတယ်။

ကျွန်တော်တို့သတင်းထောက်တွေဟာ သတင်းကို ဘယ်တော့မှ ဖုန်းနဲ့မလိုက်ချင်ကြပါဘူး။ ဘာဖြစ်လို့လဲဆိုတော့ မှားလွယ်လို့ပါ။ နောက်ပြီး ဘာသာစကား အကောက်အယူ၊ အသံနေအသံထား ကွဲပြားနိုင်လို့ပါ။ အဲဒီနှစ်ခုလွဲသွားတာနဲ့ သတင်းဟာ လွဲပါပြီ။ သူပြောတာက အပြုသဘောပြောတာ၊ အဲဒါကို ဖုန်းနဲ့နားထောင်ရတော့ ကိုယ့်နားထဲမှာတစ်မျိုးကြားပြီး အဖျက်သဘောလို့နားလိုက်လိုက်ပြီး ရေးလိုက်ရင် သွားပြီပေါ့။ ပြောသူရဲ့မျက်နှာကိုလည်း မြင်မှ မမြင်ရတာကိုး။ ဘယ်လိုမှ မတတ်နိုင်ရင်တော့တဲ့အဆုံး ဒါမှမဟုတ် ရပ်ဝေးသတင်း၊ နယ်သတင်းတွေကိုသာ ဖုန်းနဲ့လိုက်လေ့ရှိပါတယ်။

ကျွန်တော်ရဲ့အတွေ့အကြုံလေးတစ်ခုပြောပြချင်ပါတယ်။

လွန်ခဲ့တဲ့ ၅ လလောက်က ဘင်္ဂလားဒေ့ရှ် ဝန်ကြီးချုပ် ရှိတ်ခါဟာဆီနာ မြန်မာနိုင်ငံလာတုန်းက သမ္မတဦးသိန်းစိန်နဲ့တွေ့ပါတယ်။ အဲဒီမှာ ဦးသိန်းစိန်က ဘင်္ဂလားဒေ့ရ်ှက မြန်မာဒုက္ခသည်(ရိုဟင်ဂျာ) တွေကို မြန်မာနိုင်ငံထဲကို တရားဝင် ဝင်ခွင့်ပြုမယ်ဆိုပြီးတော့ ကတိပေးလိုက်ပါတယ်။ အဲဒီသတင်းကို ကျွန်တော်ရတာက Hindu Times ရဲ့ twitter စာမျက်နှာကပါ။ (နောက်နေ့သတင်းစာမှာတော့ “နှစ်နိုင်ငံတိုးတက်ရာ တိုးတက်ကြောင်းများအား ရင်းရင်းနှီးနှီးဆွေးနွေးခဲ့ကြသည်” လို့သာရေးထားပါတယ်) သတင်းကြားကြားချင်း ဒီကိစ္စဟာ ချက်ချင်းရေးရမယ့်သတင်းလို့ ကျွန်တော်သဘောပေါက်လိုက်ပါတယ်။ ကျွန်တော့်အယ်ဒီတာကလည်း လာပြောပါတယ်။ အဲဒီသတင်းကိုရေးကွာတဲ့။ အဲဒါနဲ့ သတင်းရေးဖို့ပြင်ရပါတယ်။

ဒီလိုသတင်းမျိုးရေးရတဲ့နေရာမှာ ပုံစံလေးတွေရှိပါတယ်။ တကယ်လို့ ဒီနေရာမှာ Hindu Times ကသတင်းကို တိုက်ရိုက်ဘာသာပြန်လိုက်ရင် ဒီသတင်းက ဂျာနယ်ရဲ့နောက်ကျော(Back Cover) ရောက်သွားမှာဖြစ်သလို၊ မြန်မာစာဖတ်ပရိတ်သတ်တွေကသူတို့နဲ့ တိုက်ရိုက်ပါတ်သက်မှုမရှိဘူးလို့လည်း အထင်ရောက်သွားစေပါတယ်။ ဘာဖြစ်လို့လဲဆိုတော့ (အထူးသဖြင့် ဂျာနယ်တွေမှာ ပါလေ့ရှိတဲ့) နိုင်ငံတကာသတင်းတွေကို ဖတ်တဲ့ စာဖတ်ပရိတ်သတ်က နည်းပါတယ်။ ပြီးတော့ ပြည်တွင်းသတင်း စာမျက်နှာပေါ်မရောက်တော့ သတင်းရဲ့အနီးအဝေးကွာဟမှု(Proximity) ဟာလျော့ကျသွားပါမယ်။ သတင်းဆိုတာ စာဖတ်သူရဲ့ အနီးဆုံးမှာရှိလေ၊ အနီးဆုံးမှာ ဖြစ်နေလေ အဲဒီသတင်းဟာ ပိုပြီးတန်ဖိုးရှိလေပါပဲ။ ဒါမှ သူတို့ကိုတိုက်ရိုက်သက်ရောက်မှာကိုး။ ဒါကြောင့် ကျွန်တော်က ဒီသတင်းနဲ့ပါတ်သက်ပြီး ဒေသခံ(ဒီကိစ္စဖြစ်ရင် အကျိုးသက်ရောက်မှုကို အဓိကခံရမယ့်သူတွေ) ရဲ့အသံ(ကုတ်-Quote) တွေထည့်ဖို့စဉ်းစားပါတယ်။

ဘယ်သူတွေရဲ့အသံက ဒီသတင်းကို ပိုပြီးကြွစေမလဲ။ ဒီသတင်းနဲ့ပတ်သက်ပြီး အဓိက ထင်မြင်ချက်ပေးနိုင်မယ့် Source(သတင်းရင်းမြစ်) တွေက ဘယ်သူတွေလဲ။

သတင်းကို ပြန်ကြည့်တော့ တကယ်လို့ ဒုက္ခသည်တွေကိုသာဝင်ခွင့်ပြုလိုက်ရင် ဘယ်နေရာတွေမှာ ပြဿနာရှိနိုင်လဲဆိုတော့ ဘင်္ဂလားဒေ့ရ်ှနဲ့ နယ်နိမိတ်ချင်းထိစပ်နေတဲ့ အဓိကနေရာက ရခိုင်ပြည်နယ်ပါ။ ဆိုတော့ ရခိုင်မှာရှိတဲ့ ဒေသခံတွေ၊ လွှတ်တော်အမတ်တွေ၊ ရခိုင်မှာနေထိုင်တဲ့ မွတ်ဆလင်ကိုးကွယ်သူတွေ၊ ကမန်လူမျိုးတွေကို ကျွန်တော် ဖုန်းနဲ့လှမ်းပြီး အင်တာဗျူးရပါတယ်။ အဲဒီမှာ စတော့တာပါပဲ။ ကျွန်တော်က ရခိုင်စကားအတန်အသင့်နားလည်ပါတယ်။ ဒါပေမယ့် တကယ့် နယ်စွန်နယ်ဖျားက တိုင်းရင်းသားတွေပြောလာပြီဆိုရင်တော့ တော်တော်ကလေးနားစွင့်ပြီး၊ ဂရုစိုက်ပြီးနားထောင်ရပါတယ်။ ရိုးရိုးသားသားပြောရရင် နားမလည်တာတွေကပိုများပါတယ်။

နောက်ပြီးတော့ အဲဒီလို မေးခံရတဲ့သူဆီမှာရော၊ လက်ရှိအနေအထားမှာပါ ဖြစ်ပျက်မနေတဲ့ သတင်းမျိုးကိုမေးရတာ တော်တော်ဆိုးပါတယ်။ သတင်းထောက်တွေအတွက် အခက်တွေ့စေတဲ့အခြေအနေတစ်ခုပါ။ ဘာဖြစ်လို့လဲဆိုတော့ သူတို့ကိုယ်တိုင်အဲဒါကို မသိသေးဘူး၊ ဒီကိစ္စ တကယ်ဟုတ်ရဲ့လား၊ မဟုတ်ဘူးလားဆိုတာကို သူတို့မသိတဲ့ ကျွန်တော်သတင်းထောက်ပါဆိုတဲ့၊ မျက်နှာလည်းမမြင်ရတဲ့ ငတိလေးက ပြောနေတာဆိုတော့၊ သူတို့ကိုယ်တိုင်ပြောရမှာကို ခပ်ခက်ခက်ဖြစ်နေလေ့ရှိပါတယ်။ နောက်ပြီး ဒေသိယစကားသံတွေကို ခံစားမှုနဲ့ရောထွေးပြီး ပြောတဲ့အခါကျတော့ ကျွန်တော်တို့ဒီဘက်က နားထောင်နေရတဲ့သူတွေ သေပြီပေါ့။

ကျွန်တော်မေးတဲ့သူဟာ ရိုဟင်ဂျာဆိုခဲ့ရင် ဒါမှမဟုတ် မွတ်ဆလင်ကိုးကွယ်သူဆိုခဲ့ရင် ဒီလိုဦးသိန်းစိန်က ကတိပေးတဲ့အပေါ်ခင်ဗျားတို့အနေနဲ့ ဘယ်လိုသဘောရလဲပေါ့။ သူကပြန်ဖြေမယ်။“ကြိုဆိုပါတယ်။ ဒါမှမဟုတ် စဉ်းစဉ်းစားစားလုပ်ကြရမယ့်ကိစ္စပါ။ မဖြစ်နိုင်ဘူး။” စသဖြင့်… ရခိုင်တိုင်းရင်းသားတွေကိုမေးမယ်ဆိုရင်လည်း “ဒီကိစ္စကို ကန့်ကွက်ပါတယ်၊ ဒီကိစ္စဟာ မဖြစ်သင့်တဲ့ကိစ္စပါ၊ လက်လွှတ်စပါယ်လုပ်လို့မရဘူး၊ ဒါမျိုးဆိုတာသေချာစဉ်းစားရပါမယ်”စသဖြင့်… ရခိုင်ပြည်နယ် လွှတ်တော်အမတ်တွေ၊ ပြည်ထောင်စုလွှတ်တော်မှာရှိတဲ့ တိုင်းရင်းသားအမတ်တွေကိုလည်း မေးရပါတယ်။ နေရာစုံအောင်၊ နယ်ပယ်စုံအောင်လည်းမေးရပါတယ်။ ဘက်နှစ်ဘက်စလုံးကိုလည်း မထိခိုက်ရစေတဲ့၊ ယုတ္တိကျတဲ့၊ နှစ်ဘက်လုံးရဲ့အသံတွေလည်းဖြစ်တဲ့၊သတင်းခေါင်းစဉ်ကို တိုက်ရိုက် support လုပ်ပေးနိုင်မယ့် အားရှိတဲ့ကုတ် (Strong Quote) မျိုးကိုရအောင်မေးရပါတယ်။

ဖုန်းခွက်ပူလာအောင်မေး၊ ပြောတဲ့သူကပြန်ပြော၊ နောက်ဆုံး ဒီသတင်းနဲ့ပတ်သက်ပြီး ကျွန်တော်လိုချင်တဲ့ရှုထောင့်ကိုအတည်ပြုနိုင်ဖို့ လူတစ်ယောက်ကို မိနစ် ၂၀ လောက်ပြောလိုက်ရပါတယ်။ လူ ၁၀ ယောက်လောက်ကို နယ်ပယ်စုံအောင် မေးရတာဆိုတော့ အဲဒီနေ့က တော်တော်ခေါင်းခြောက်သွားပါတယ်။ နားတွေလည်းအူလို့။ တကယ်လို့ ကျွန်တော်တို့ကမေးတယ်၊ source ကမပြောဘူး၊ ထင်မြင်ချက်လည်းမပေးနိုင်ဘူးဆိုရင်တော့ အဲဒီသတင်းကို လံကြုတ်လုပ်ပြီးရေးလို့မရပါဘူး။ နောက်ရှုထောင့်(News Angle) တစ်မျိုးရေးနိုင်အောင် စဉ်းစားရပါတယ်။

ဒီလိုမျိုးထိလွယ်ရှလွယ် သတင်းတွေကို ဖုန်းနဲ့လိုက်ရတာအခါ တော်တော်လေးချိန်ဆရပါတယ်။ နောက်ပီးတော့ ဒီသတင်းမျိုးက ဖုန်းနဲ့ပဲလိုက်လို့ရမယ်လေ။ ဒါမှမဟုတ်ရင်လည်း သတင်းကြားကြားခြင်း ရခိုင်အထိ၊ ဘင်္ဂလားဒေ့ရ်ှနယ်စပ်ထိ ဟယ်လီကော်ပတာနဲ့ သွား၊ ရခိုင်ဒေသခံများ၏ရင်တွင်းခံစားချက်များဆိုပြီးတော့ သူတို့ကို အင်တာဗျူး၊ ဒါမှမဟုတ် တိုက်ရိုက် Live လွှင့်ရတော့မှာပဲ။

ဘယ်လိုပဲဆိုဆို အဲဒီသတင်းကို ကျွန်တော် အောင်အောင်မြင်မြင်ရေးနိုင်ခဲ့ပါတယ်။
(ဆက်လက်ရေးသားပါဦးမည်)

သတင်းထောက်တစ်ဦး၏ မှတ်စု(၂)

သတင်းလောကနဲ့ နည်းနည်းအလှမ်းဝေးတဲ့ သူတွေက သတင်းထောက်တွေကို မေးလေ့ရှိတဲ့ မေးခွန်းတစ်ခုရှိပါတယ်။
တစ်ခုခုဖြစ်တယ်ဆိုရင် ဘယ်လိုသိတာလဲ တဲ့။ ကိစ္စတော်တော်များများကို တကယ်လုပ်တဲ့သူတွေ၊ ခံရတဲ့သူတွေထက် သတင်းထောက်တွေက ပိုပြီးစောစောရောက်တတ်ကြတယ်၊ စောစောသိတတ်ကြတယ် တဲ့။ ဘယ်လိုလုပ်ပြီး အဲဒီလိုသိတာလဲ လို့မေးပါတယ်။

ပုံမှန်အတိုင်းဆိုရင်တော့ တော်တော်ဖြေရခက်တဲ့မေးခွန်းပါ။ ကျွန်တော့်ကို အဲဒီလိုလာမေးတိုင်း ကျွန်တော်ဖြေလိုက်ရင် ကိုးယိုးကားယားတွေချည်းပါပဲ။ ဒါပေမယ့် ကျွန်တော်နားလည်သလိုတော့ ပြန်ပြောပြလေ့ရှိပါတယ်။

ကျွန်တော်တို့ သတင်းထောက်တွေ ပွဲတစ်ပွဲ၊ ဒါမှ မဟုတ် လူသတ်မှုတစ်ခု၊ ဒါမှမဟုတ် ဆန္ဒပြမှုတစ်ခု ကို သတင်းယူဖို့ဆိုရင် သတင်းထောက်တော်တော်များများဟာ သိကြပြီးဖြစ်ပါတယ်။ ဘာဖြစ်လို့လဲဆိုတော့ ဆန္ဒပြမယ်၊ ဒါမှမဟုတ် ပွဲလုပ်မယ်ဆိုရင် နိုင်ငံရေးသမားတွေ၊ ကုမ္ပဏီတွေကနေ ကျွန်တော်တို့ကို ဖိတ်ပါတယ်။ လူသတ်မှုဆိုရင်လည်း သတင်းထောက်တော့ထားပါ။ သာမန်လူတွေတောင် သိနိုင်ပါတယ်။ အဲဒီတော့ ကျွန်တော်တို့ ရောက်သွားပြီဆိုပါစို့။ အဲဒီကနေစပြီး တစ်ယောက်က သတင်းတစ်ခုရှိတယ်ပြောမယ်။ နောက်တစ်ယောက်က တစ်ခုရှိတယ်ပြောမယ်နဲ့။ ပွဲတစ်ပွဲပြီးတဲ့အချိန်မှာ ကျွန်တော်တို့ သတင်းအစ သုံးခုလောက်ရသွားတတ်ကြပါတယ်။ ဆိုတော့ သတင်းမဖြစ်သေးခင်မှာကို ကျွန်တော်တို့မှာ သတင်းအစတွေရှိနေပါပြီ။ ဒါက ဖြစ်လာမယ့် သတင်း၊ ဖြစ်နိုင်တဲ့သတင်းကို ပြောတာပါ။

နောက်တစ်ခုက မမျှော်လင့်ထားတဲ့ကိစ္စရပ်တွေ ဖြစ်လာတယ်ဆိုရင်ပေါ့။ ဥပမာ မီးလောင်တာတို့၊ တိတ်တဆိတ်လူသတ်သွားတာတို့ဆိုရင် ကျွန်တော်တို့သတင်းသမားတွေက တစ်ဦးသိတာနဲ့ တစ်ဦးသိနိုင်ဖို့ မခဲယဉ်းတော့ပါဘူး။ အဲဒီလိုနဲ့ ကျွန်တော်တို့ သတင်းအစတွေကို လိုက်ကြရပါတယ်။(ချွင်းချက်အနေနဲ့ ပြောစရာတွေကတော့ အများကြီးပေါ့ဗျာ)။
နောက်ပြီးတော့ ပေးသတင်း၊ လိုက်သတင်း၊ ထုတ်နှုတ်သတင်းဆိုတာတွေလည်းရှိသေးတယ်ဗျ။

ပေးသတင်းဆိုတာတော့ အဖွဲ့အစည်းတစ်ခုခု၊ လူတစ်ဦးတစ်ယောက်က သတင်းထောက်ကို ယူစေချင်တဲ့၊ သူတို့သတင်းကို ရေးပေးစေချင်တဲ့ သတင်းမျိုး။ လိုက်သတင်းကတော့ အထက်က အကြောင်းအရာတွေလိုမျိုး၊ ထုတ်နှုတ်သတင်းက ကြေငြာချက်၊ သတင်းစာ၊ ဟောပြောချက်၊ အစည်းအဝေးပွဲတွေကနေ သတင်းဖြစ်နိုင်ခြေရှိတဲ့ အကြောင်းတွေကို ထုတ်ရေးရတာ။ နောက်တစ်ခုရှိသေးတယ်ဗျ။ ခုနောက်ပိုင်းမှ ပေါ်လာတာပါ။ “ကုတ်(Quote) ပေါင်းချုပ်” တဲ့။ သတင်းဆောင်းပါးတွေ ရေးတဲ့နေရာမှာ ခပ်ပျင်းပျင်းရှိတဲ့သတင်းထောက်က ပြောစကားတွေနဲ့ချည်း ရေးထားတဲ့ သတင်း ဒါမှမဟုတ် သတင်းဆောင်းပါးကို ကျွန်တော်တို့ သတင်းထောက်တွေ အချင်းချင်း “ကုတ်(Quote)ပေါင်းချုပ်” လို့ စနောက်ကြတယ်။

ကျွန်တော် မှတ်မှတ်ရရ စစ်တပ်က လယ်သိမ်းတာခံရတဲ့ လယ်သမားတွေက မီဒီယာနဲ့တွေ့ချင်တယ်ဆိုပြီး အင်န်အယ်ဒီပါတီဝင်တစ်ယောက်ရဲ့ ပေးသတင်းတစ်ပုဒ်လိုက်ဖူးတယ်ဗျ။
စကားစပ်မိလို့ပြောရဦးမယ်။ ဒီလောကမှာတော့ အဲဒီလိုတွေအများကြီးပဲဗျ။ ဘယ်ပါတီက ဘယ်သူက ဘယ်ကိစ္စကို ဖိတ်ပြန်ပြီ၊ ဘယ်ပါတီက ဘယ်သူက မီဒီယာတွေကို တွေ့ပြန်ပြီနဲ့။ အဲဒီသူတွေကို ကြည့်လိုက်ရင် သူတို့ ပါတီထဲမှာ၊ ဒါမှ မဟုတ်အဖွဲ့အစည်းထဲမှာ နေရာ မရတဲ့သူတွေများပါတယ်။ သူတို့က ဒီလို(သူတို့အခေါ်-လူမှုရေး) အလုပ်တွေကို သူတို့ ကိုယ်ပိုင်ပိုက်ဆံနဲ့ လုပ်နေကြတာများပါတယ်။ သူတို့အထောက်အပံ့ဘယ်လိုယူသလဲတော့ မသိရပါဘူး။ လယ်သိမ်းတဲ့ကိစ္စတွေ၊ စက်ရုံအလုပ်သမားတွေ ဆန္ဒပြတဲ့ ကိစ္စတွေ ခုနောက်ပိုင်းတော်တော်ဖြစ်လာတော့ သူတို့နဲ့ ကျွန်တော်တို့ သတင်းထောက်တွေ အမြဲတမ်းအဆက်အဆံရှိပါတယ်။

ဆက်ပါဦးမယ်။ အဲဒီစစ်တပ်က လယ်သိမ်းတဲ့ကိစ္စကို သွားဖို့ အဲဒီပါတီက လူတစ်ယောက်က သတင်းထောက်တွေကို ၃၈ လမ်းက လက်ဖက်ရည်ဆိုင်တစ်ဆိုင်မှာ စုရပ်လုပ်ဖို့ချိန်းပါတယ်။ မနက် ၉ နာရီတဲ့။ ဒါက ထုံးစံတစ်ခုပါ။ ဂျာနယ်တိုက်တော်တော်များများကို ပါချင်တယ်ဆိုရင် သူတို့(သတင်းရင်းမြစ်) တွေက အဲဒီလိုစုရပ်လုပ်ပြီး ကားတစ်စီးငှားပြီး အားလုံးကို သတင်းဖြစ်နေတဲ့ နေရာ(သူတို့အတွက်-ပြဿနာဖြစ်နေတဲ့နေရာ) ကို ခေါ်သွားပါတယ်။
အဲဒီနေ့က တော်တော်ကို ပျော်စရာကောင်းပါတယ်။ ဂျာနယ်တိုက် တွေအများကြီးပါလာပါတယ်။ Venus, Farmers(ဂျာနယ်သစ်), Popular News, True News, 7Day, The Voice, ဧရာဝတီ(Online Media), DVB စသဖြင့် ဂျာနယ်လစ်အယောက် ၂၀ လောက်ပါလာပါတယ်။

သတင်းထောက်တွေ တစ်စုတစ်ဝေးတည်း တစ်နေရာကို သွားဖို့ဆိုတာ စိတ်တောင်မကူးရဲတဲ့ကိစ္စပါ။ အဲဒီလို စုပေါင်းပြီး သွားကြပြီဆိုရင် အင်မတန်ပျော်ကြပါတယ်။
“ဟေ့ကောင် ဟိုအပတ်က မျက်နှာဖုံးက သတင်းက အမှားကြီး။ မင်းတို့အယ်ဒီတာက လူညစ်။ ဘာ…စာမူခက တစ်ပုဒ် ၁၅၀၀ ဟုတ်လား”
အဲဒီလိုမျိုးတစ်ယောက်ရဲ့ဂျာနယ်အကြောင်းတစ်ယောက်ပြောလိုက်နဲ့၊ စလိုက်၊ နောက်လိုက်နဲ့ ကျွန်တော်တို့ သတင်းယူရမယ့်နေရာ၊ သန်လျင် တစ်ဖက်ကမ်းက ရွာကလေးတစ်ရွာကို ရောက်လာပါတော့တယ်။

အဲဒီရွာကလေးမှာ လယ်ဧက ၂၀၀၀ ကျော်လောက်ကို ရေတပ်က ဗိုလ်မှုးကို နှစ်စဉ်ကြေးပေးရတယ်။ ခုသူတို့က နှစ်စဉ်ကြေးကို မပေးနိုင်တော့ဘူး။ နွားတွေ၊ လယ်တွေရောင်းပြီး နှစ်စဉ်ကြေးပေးရလို့လည်း ကုန်ပြီ။ ခုလည်း သူတို့လယ်တွေကို သိမ်းမယ်ဆိုလို့ အဲဒါနဲ့ သူတို့ခံစားချက်တွေကို မီဒီယာကို ဖွင့်ချချင်တယ်ဆိုတဲ့သဘော။ အဲဒါနဲ့ လယ်သမားတွေတွေကို သတင်းထောက်တွေက အင်တာဗျူးကြ၊ ဓါတ်ပုံရိုက်တဲ့သူက ရိုက်၊ မူဗီ ရိုက်တဲ့သူက ရိုက်နဲ့။

ဒါနဲ့ အဲဒီမှာ တစ်ခုက ကျွန်တော်တို့က သတင်းတစ်ခုတော့ရပြီ ခံရတဲ့သူတွေကိုလည်း မေးပြီးသွားပြီ။ ဒါပေမယ့် လုပ်တဲ့သူဘက်ကိုမေးရပါဦးမယ်။ အဲဒါနဲ့ လယ်သမားတွေပြောတဲ့အထဲမှာပါတဲ့၊ သူတို့နဲ့ အဓိကအဆက်အဆံရှိတဲ့ ရေတပ်က ဗိုလ်ကြီး ကို ကျွန်တော်တို့ သွားတွေ့ရပါတော့မယ်။ လယ်သမားတွေက ခံစားချက်နဲ့ပြောတာဆိုတော့ ကျွန်တော်တို့ကလည်း သူတို့ဘက်က မှန်တယ်ဆိုရင်တောင် သူတို့ပြောတာကိုလည်း သက်သေပြရာရောက်အောင်၊ စစ်ဆေးနိုင်အောင်၊ ဟိုဘက်က လူရဲ့ အသံ(အသံသက်သေ) ပါအောင် ထည့်ကြရမှာဆိုတော့ အဲဒီရွာကလေးနဲ့ မနီးမဝေးရှိတဲ့ ရေတပ်က ဗိုလ်ကြီး ဆိုသူဆီကို သူတင်းထောက် အယောက် ၂၀ လောက်ချီတက်သွားကြပါတော့တယ်။

တပ်အဝင်ဝမှာတင် ဂိတ်စောင့် စစ်သားတစ်ယောက်က ဝင်ခွင့်မပြုနိုင်ဘူးတဲ့။ ဟာသွားပြီပေါ့။ ကျွန်တော်တို့နောက်မှာ လယ်သမားတွေရော၊ ပါတီဝင်တွေပါ ပါလာတယ်။ ကျွန်တော်တို့ဘယ်လိုလုပ်မလဲ။ ဒါနဲ့ ဂိတ်စောင့်ကိုပြောရတယ်။ ဟုတ်ပြီ ကျွန်တော်တို့က သတင်းထောက်တွေပါ။ ဒီက လယ်သမားတွေက ဒီလိုပြောတယ်။ အဲဒါကို ဟုတ်သလားမဟုတ်ဘူးလား ကျွန်တော်တို့က မေးချင်လို့။ တကယ်လို့ အတွေ့မခံဘူးဆိုရင် ရတယ်။ ကျွန်တော်တို့က လယ်သမားတွေရဲ့ အသံ၊ လယ်သမားတွေရဲ့ သက်သေတွေနဲ့ ရေးပစ်လိုက်မှာလို့ဝိုင်းပြောကြတယ်။

နောက်တော့ အဲဒီဂိတ်စောင့်က C.O အဆင့်ရှိတဲ့ ဗိုလ်တစ်ယောက်ကို သွားခေါ်ပေးပါတယ်။ အဲဒီလူက ပြောတယ်။ သူဒီကိစ္စကို မပြောနိုင်ပါဘူးတဲ့။ သူ့အထက် G2 လာမှပဲ ပြောနိုင်ပါမယ်တဲ့။ ကျွန်တော်တို့ကို တပ်ထဲလည်းပေးမဝင်ဘူး၊ သူတို့တပ်ရဲ့ အပြင်ဘက် လယ်ကွင်းစပ်နားမှာပဲ စောင့်ကြရပါတယ်။ အဲဒါနဲ့ ကျွန်တော်တို့ သတင်းထောက်တစ်ဖွဲ့လုံး တပ်ရှေ့က အုတ်ခုံတွေပေါ်မှာ ထိုင်၊ စကားပြောတဲ့သူကပြော၊ C.O ဗိုလ်ကြီးကို ဝိုင်းပြီး ကျပ်တဲ့သူက ကျပ်နဲ့။ G2 ကိုစောင့်ကြရပါတော့တယ်။ အဲဒီ C.O ကပြောပါတယ်။ နောက်နေ့မှလာတဲ့။

ကျွန်တော်တို့က ဖောင်ပိတ်ရက်နဲ့ ချိန်ပြီးလုပ်ကြရတာဆိုတော့ နောက်ရက်ကို မလာနိုင်ဘူး၊ နောက်ပြီး ဒီနေရာက လာရတာ အင်မတန်ဝေးတယ်။ တစ်စုတစ်ဝေးထဲလာမှလည်း စိတ်ချရတယ်လေ။
အဲဒါနဲ့ ထိုင်စောင့်ကြရပါတော့တယ်။ ပြဿနာက အဲဒီမှာ စပါတော့တယ်။ ကျွန်တော် အိမ်သာ(Toilet) သွားချင်လာပါတယ်။ ကိစ္စက ထိပ်ဝမှာ အကြီးအကျယ်ဖြစ်လာပါတယ်။ ဘေးနားမှာကလည်း သတင်းထောက်တွေ အပြည့်၊ ရှေ့တည့်တည့်မှာ စစ်သားအယောက် ၁၀ ယောက်လောက်ကလည်း သတိအနေအထားနဲ့။ C.O ဆိုတဲ့သူကလည်း ခပ်မာမာ။ ဒုက္ခရောက်ပါတော့တယ်။

၅ မိနစ်လောက်အောင့်ခံပါသေးတယ်။ ဘယ်လိုမှ မရတာနဲ့ အဲဒီ C.O ဆိုတဲ့သူကိုပဲ အကူအညီတောင်းရပါတော့တယ်။ ဗိုလ်ကြီး ကျွန်တော်နောက်ဖေးသွားချင်လို့ လို့ ပြောလိုက်ပါတယ်။ အဲဒီဗိုလ်မှုးတော်တော် ခေါင်းစားသွားပါတယ်။ တပ်အဝမှာလည်း စစ်သားတွေက အခြေအနေကြည့်နေတယ်။ နောက်ဆုံးဗိုလ်ကြီးက ပြောပါတယ်။ ရပါတယ် တဲ့…ဟေ့ကောင်လေး သူ့ကို အိမ်သာလိုက်ပို့ပေးလိုက်ပါတဲ့။ တစ်ခြား ဘော်ဒါသတင်းထောက်တွေကတော့ ဟေ့ကောင်တဲ့ မင်းကို အိမ်သာတက်နေတုန်းသော့ခတ်ထားရင် ဘယ်လိုလုပ်မလဲတဲ့။ အဲဒါနဲ့ ကျွန်တော်လည်း ကြောက်ကြောက်လန့်လန့်နဲ့ တပ်ထဲကို အီးပါဖို့ ဝင်သွားပါလေရော။ ကျွန်တော့်ဘေးက ၂ ရစ်ရယ်၊ တစ်ပွင့်ရယ်၊ စစ်သားနှစ်ယောက်ပါလာတယ်။

အဲဒီအချိန်မှာ ကျွန်တော်က သူတို့တပ်မြေထဲမှာ လမ်းတစ်ဝက်လောက်ကျိုးနေပြီ။ နောက်ကို ပြန်လှည့်ကြည့်လိုက်တယ်။ အခြေအနေမကောင်းရင်တော့ ပြေးမယ်ပေါ့။ ဘာဖြစ်လို့လဲဆိုတော့ အပြင်က သတင်းထောက်တွေကလည်း စိုးရိမ်စိတ်နဲ့ ကြည့်နေကြတယ်(ဘာဖြစ်လို့လဲတော့မသိဘူး)။ တပ်ထဲကို ဘယ်သူမှ မဝင်ရဘဲ ကျွန်တော်တစ်ယောက်တည်း ဝင်သွားလို့ပဲလားတော့မသိဘူး။ လမ်းတစ်လျှောက်လုံးမှာရှိတဲ့ စစ်သားတွေကလည်း စူးစမ်းတဲ့ မျက်လုံးတွေနဲ့ ကြည့်နေကြတယ်။ လမ်းကလည်းတော်တော်ရှည်တယ်။ တပ်ထဲမှာ အီးတစ်ခါပါဖို့ မလွယ်ပါလားလို့တောင်တွေးမိလိုက်သေးတယ်။

အဲဒါနဲ့ အိမ်သာကို လှမ်းမြင်ရတဲ့အနေအထားကို ရောက်လာတယ်။ အိမ်သာနားမှာရှိတဲ့ စစ်သားတစ်ယောက်က ကျွန်တော့်ဘေးက ၂ ရစ်နဲ့ တစ်ပွင့်ကို လှမ်းမေးတယ် ဘာလဲကွတဲ့။ ဘေးက နှစ်ယောက်ကပြန်ပြောတယ်။ C.O လွှတ်လိုက်တာတဲ့။ အဲဒါနဲ့ ကျွန်တော်လည်း အိမ်သာထဲ ရှောရှောရှုရှု ရောက်သွားပါလေရော။ အရေးထဲမှာ အိမ်သာတစ်လုံးက ရေမရှိလို့ နောက်တစ်လုံး ပြောင်းတက်လိုက်ရသေးတယ်။

အိမ်သာခွက်မှာ ထိုင်မယ်ကြံကာရှိသေး အပြင်က အသံတစ်ခုကြားရတယ်။ ညီလေး အဆင်ပြေလားတဲ့။ ဟုတ်ကဲ့ လို့ပြန်ပြောလိုက်တယ်။ နောက်တစ်ခါ နောက်တစ်သံထပ်ထွက်လာတယ်။ ညီလေး ရေရှိလားတဲ့။ ဟုတ်ကဲ့လို့ ပြန်ပြောလိုက်တယ်။ နောက်တစ်ခါ ညီလေး လိုတာရှိပြောနော်တဲ့။ အစ်ကိုတို့အပြင်မှာ အဆင်သင့်ပဲတဲ့။ ညီလေး ဘာလိုသေးလဲ တဲ့။ ကျွန်တော် ဘယ်လိုမှ ကိစ္စကို မရှင်းနိုင်တော့ဘူး။ အပြင်ကနေ တစ်ခုပြီးတစ်ခု လှမ်းမေးနေတယ်။ ထပ်မေးပြန်တယ် ညီလေး ဘာလိုသေးလဲ တဲ့။
အရေးကြီးတဲ့ အပိုင်းကို အဓိကဖြေရှင်းပြီးတော့ အထဲမှာ ဘယ်လိုမှ မနေနိုင်တော့လို့ အပြင်ပြန်ထွက်လာလိုက်ရတော့တယ်။
မေးသေးတယ်။ ညီလေး အားလုံး OK လားတဲ့။ ဟုတ်ကဲ့။

ဘယ်လိုမှ မကြုံစဖူး စစ်တပ်ရဲ့အစောင့်အရှောက်နဲ့ အီးပါဖူးတာ တော်တော်အီစိမ့်သွားပါတယ်။
တပ်အပြင်ရောက်တော့ ကျွန်တော့်သူငယ်ချင်း သတင်းထောက်ဘော်ဒါတွေရဲ့ သက်ပြင်းချသံတွေကြားရတယ်။
ဟူး…မင်းပြန်ထွက်လာသေးတာကိုးတဲ့။

အဲဒီနေ့ က G2 ဆိုတဲ့သူလည်းရောက်မလာဘဲ ကျွန်တော်တို့သတင်းထောက်တွေသာ သတင်းရှုထောင့် ဘယ်လိုရေးမလဲစဉ်းစားကြရင်း ကိုယ့်အိမ်ကိုယ် ပြန်လာခဲ့ရတော့တယ်။

အဲဒီလို တစ်နေကုန်သတင်းလိုက်ရင်း သတင်းရေးစရာ လောက်လောက်လားလား အထောက်အထားမရတဲ့ ရက်တွေလည်း အများကြီးပါပဲဗျာ။
(ဆက်လက်ရေးသားပါဦးမည်)

သတင်းထောက်တစ်ဦး၏ မှတ်စု

သတင်းထောက်တစ်ဦး၏ ဒိုင်ယာရီ ဆိုပြီး နာမည်သာတပ်လိုက်ရတယ်။ ဒီလို နာမည်မျိုးက ဝါရင့်သတင်းစာဆရာကြီးတွေ သူတို့အတွေ့အကြုံတွေအကြောင်းရေးရာမှာ တပ်လေ့ရှိတဲ့ ခေါင်းစဉ်မျိုး။ ကျွန်တော်က ခုမှ သတင်းသမားပေါက်စမျှသာ။ ဒါပေမယ့် ခေါင်းစဉ်တပ်မယ့် နာမည်ရှာလိုက်တော့လည်း မတွေ့တာနဲ့ ဒီနာမည်ပဲ တပ်လိုက်ရတော့တယ်။

သတင်းထောက်တစ်ဦး၏ ဒိုင်ယာရီ ဆိုတော့ နေ့စဉ်မှတ်တမ်းပဲရေးရမလား စဉ်းစားလိုက်သေးတယ်။ ဒါပေမယ့် မဖြစ်ဘူး။ နေ့စဉ်မှတ်တမ်းထဲမှာက သူ့ကို သွားကြိုတာတွေ၊ အစ်မဝမ်းခွဲဆေးရုံတက်တာတွေ၊ ဦးလေးအရက်မူးလို့ ရပ်ကွက်နဲ့ရန်ဖြစ်တဲ့အကြောင်းတွေနဲ့ အစုံသုပ်ဖြစ်နေတယ်။ ဒါကြောင့် သတင်းနဲ့ဆိုင်တဲ့၊ သတင်းလိုက်ရင်းဖြစ်တဲ့အတွေ့အကြုံတွေပဲ ရေးတော့မယ်လို့ ဆုံးဖြတ်လိုက်တယ်။

ကျွန်တော်သတင်းထောက် စဖြစ်တော့ ပထမဆုံးကြုံရတဲ့ဒုက္ခက နာမည်ကိစ္စပါ။ ကျွန်တော့်မွေးရပ်က လူတွေ ရန်ကုန်ကိုလာရင် သူတို့ကမေးပါတယ်။ ဟေ့ကောင် မင်းဘာလုပ်နေလဲ လို့ ကျွန်တော့်ကို မေးရင် ကျွန်တော်က သတင်းထောက်လုပ်နေတယ်လို့ ပြန်ဖြေလိုက်တယ်။ အဲဒီမှာ သူတို့က ဘာမေးလဲဆိုတော့ ဘယ်လိုသတင်းထောက်လဲတဲ့။ ထောက်လှမ်းရေးလားတဲ့။ နောက်တစ်မျိုးထပ်ပြောပါတယ်။ မဟုတ်ဘူး ဂျာနယ်သတင်းထောက် လို့။ အော် အော် ဂျာနယ်တွေကို သတင်းထောက်တာလားတဲ့။ ကျွန်တော်လည်း ဘာမှ ပြန်မပြောတော့ဘဲ ကျွန်တော့်သတင်းတွေပါတဲ့ ဂျာနယ်ကို ပေးဖတ်လိုက်တယ်။ ကဲ အဲဒီတော့ မှအေးရော မမေးတော့ဘူး။ ဒါတောင်လုပ်သေးတယ်။ သတင်းထောက်ဆိုတော့ သတင်းတွေရအောင်၊ သတင်းတွေရှာဖို့ နေရာတကာလျှောက်သွားနေရမှာပေါ့တဲ့။

နောက်တစ်ခုက သတင်းထောက်ဖြစ်စ ကျွန်တော်တို့လိုလူငယ်တွေ ကြုံတွေ့ရတဲ့ဒုက္ခက ကင်မရာ၊ ရစ်ကော်ဒါ ကိစ္စ။ သိပ်ချမ်းသာတဲ့ ဂျာနယ်ကြီးတွေက သတင်းထောက်အသစ်တွေကတော့ အဲဒီလို ဒုက္ခမျိုးကြုံတွေ့ရမှာ မဟုတ်ပါဘူး။ ကျွန်တော်ကတော့ သတင်းထောက်လုပ်လုပ်ခြင်း ဂျာနယ်အသစ်ကလေးတစ်စောင်မှာဆိုတော့ အဲဒီကိစ္စက တော်တော်ဆိုးတယ်။ သတင်းလိုက်ဖို့သွားရင် သူများတွေက ကင်မရာတွေတဖျတ်ဖျတ်၊ ရီကော်ဒါတွေ ပါးစပ်နားထိုးပေးနေတဲ့အချိန် ကျွန်တော်ကတော့ စာအုပ်ထဲမှာအသေအကြေ လိုက်မှတ်နေရပါတယ်။ ဒါက သတင်းထောက်အသစ်တွေ မဖြစ်မနေကြုံရတဲ့ ဒုက္ခတစ်ခုပေါ့ဗျာ။

မှတ်မှတ်ရရ ကျွန်တော့်သတင်းထောက်ဘဝရဲ့ ပထမဆုံး နိုင်ငံရေးပွဲတစ်ပွဲ တစ်ခုအကြောင်းလည်း ပြောချင်ပါသေးတယ်။

အင်န်အယ်ဒီပါတီ မှတ်ပုံတင်ရေး၊ မတင်ရေးကိစ္စ ဆုံးဖြတ်မယ့်နေ့က အင်န်အယ်ဒီရုံးချုပ်ရှေ့မှာ သတင်းထောက်တွေက အများကြီး ကင်မရာတွေနဲ့ရိုက်၊ အင်တာဗျူးသူကဗျူး။ ကျွန်တော်ကတော့ ခပ်တည်တည်ပဲကြည့်နေရတယ်။ ကိုယ်ဘာမှ မလုပ်နိုင်ဘူး။ အဲ ဒေါ်အောင်ဆန်းစုကြည် စကားပြောမယ့်အလှည့်လည်းရောက်ရော ရုံးချုပ်အပြင်မှာ ရှိနေတဲ့ သတင်းထောက်တွေရော၊ နိုင်ငံခြားမီဒီယာတွေပါ ဝုန်းကနဲ ရုံးအဝင်ဝကို တိုးဝင်လာပါလေရော။
ဟာ အဲဒီမှာသွားပါလေရော။ ကျွန်တော့်ဖိနပ်ကို NHK သတင်းဌာနက ငနဲ တက်နင်းလိုက်တာ ပြတ်သွားရော။ ဂရုမစိုက်လိုက်နိုင်ဘူး။ လက်က ရေးနေရသေးတယ်။

ဒေါ်အောင်ဆန်းစုကြည်က အထဲကနေပြော။ အပြင်မှာက သတင်းထောက်တွေက ချွေးတလုံးလုံးနဲ့လိုက်ရေးနဲ့။ သူမလည်းပြောပြီးရော ကျွန်တော့်မှာ ခြေတုံးလုံးနဲ့။
ကြားမှာ ပြဿနာတစ်ခုတက်လိုက်သေးတယ်။ ကုမုဒြာက မမတစ်ယောက်နဲ့၊ 7Day က မမတစ်ယောက်က သူတို့ကို တွန်းပါတယ်ဆိုပြီး ဒေါပွနေလို့ မနည်းချော့လိုက်ရသေးတယ်။

နောက်ဆုံးတော့ တက္ကစီငှားဖို့ပိုက်ဆံကလည်းမပါ။ ရုံးမှာ ပြန်ထုတ်ရင်လည်း အက်ဒမင်ဆိုတာတွေနဲ့ စကားပြောရမှာမို့ ရွှေဂုံတိုင်မှတ်တိုင်ကို ခြေလျင်ပဲ လျှောက်သွားလိုက်တော့တယ်။
ကျွန်တော်တို့ သတင်းထောက်တွေကလည်း အဆိုးသားဗျ။ သတင်းတစ်ခု၊ ဓါတ်ပုံတစ်ပုံကို ချက်ချင်းဖြစ်နေတဲ့အချိန်မှာ ချက်ချင်းယူရမှ ကျေနပ်ကြတယ်။ အလုပ်သဘောအရလည်း အချိန်ဆိုတာ သိပ်အရေးကြီးတယ်။ ဒါကြောင့် တစ်ယောက်နဲ့တစ်ယောက် တွန်းလိုက်။ ထိလိုက်။ ဖိနပ်တက်နင်းလိုက်နဲ့။ ထမင်းငတ်လိုက်။ အယ်ဒီတာက ဆူလိုက်နဲ့။

ဒီလိုနဲ့ပဲ စာမျက်နှာပေါ်ရောက်အောင် လုပ်ကြရတာ။ အဲ စာမျက်နှာပေါ်မရောက်ခင် စိစစ်ရေးကဖြတ်ရင် နောက်တစ်ပတ်အတွက် တွက်ခြေသိပ်မကိုက်တော့ပြန်ဘူး။
(ဆက်လက်ရေးသားပါဦးမည်)

Tuesday, May 15, 2012

တရုတ်နားနီး တရုတ်၊ ကုလားနားနီးကုလား


တကယ်တော့ ကျွန်တော်တို့ မြန်မာနိုင်ငံဟာ ကိုယ်ဝန်အငှားဆောင်ပေးနေရတာပါ။

ဟိုတုန်းကတော့ မုဆိုးနားနီး မုဆိုး၊ တံငါနားနီး တံငါပေါ့၊ အခုတော့ ခေတ်ကပြောင်းကုန်ပြီ။
သိတဲ့အတိုင်းပဲ အိုးနှစ်လုံးကြားညပ်နေတာဆိုတော့ ကြာရင် ကျွန်တော်တို့မြေအိုးတွေ ကွဲကုန်လိမ့်မယ်(ပြည်သူ့ခေတ်)။

အမှန်တကယ်က တရုတ်နားနီးတဲ့သူတွေကလည်း တရုတ်မဖြစ်ကြပါဘူး၊ ကုလားနားနီးတဲ့ သူတွေကလည်း ကုလားမဖြစ်ကြတာ
ရခိုင်ပါတီက ဟီလာရီကလင်တန်ကို ရိုဟင်ဂျာနဲ့ပတ်သက်ပြီး စာပေးတာကိုကြည့်ကတည်းက သိသာပါတယ်။

ဒါပေမယ့် တရုတ်ဇာတ်သွင်းခံနေရတာနဲ့၊ ကုလားဇာတ်သွင်းခံနေရတာကတော့ အားလုံးမြင်သာနိုင်မယ် ထင်ပါတယ်။

မြစ်ဆုံကြီး ရပ်ပစ်လိုက်တော့ လာလိုက်တဲ့ တရုတ်သံအမတ်တွေ၊ ရန်တွေ့တာပေါ့၊ သမ္မတအိမ်တော်နဲ့ ငါးစိမ်းတန်းပဲကွာတာ။
ဘယ်ပြောကောင်းမလဲ မြန်မာကလည်း ပြန်ပီးစိတ်ကောက်ပစ်လိုက်တယ်။ နင်နဲ့မပေါင်းဘူး၊ အမေရိကန်နဲ့ပဲ ကစားမယ်ပေါ့။
တရုတ်က ပြန်ချော့တယ်၊ မလုပ်ပါနဲ့ လွှတ်တော် အတွက် ပစ္စည်းလေးဘာလေးလှုပါမယ်ဆိုတော့...အရင်းထဲက အမြတ်ပေါ့။
အဲဒီမှာ တမင်သက်သက် ပါးရိုက်ခံလိုက်ရတာက ရာဇဝင်ထဲကသတုိ့သမီး။

ဒီဘက်က ကုလားတွေကလည်း ပွဲလန့်တုန်းဖျာခင်းမယ် စဉ်းစားတယ်။ လုပ်လက်စတွေ မြန်မြန်ပြီးအောင် လုပ်ကြတယ်။ အဲဒီမှာ
ကျောက်ခဲအဖြူတွေနဲ့ ကောက်ပေါက်ခံရတော့ နည်းနည်း ဖျာစတွေချိုးကြတယ်။ အဲဒီမှာ ကစ္စပနဒီလှိုင်းသံတွေ ငိုချင်းချခဲ့တယ်။

စဉ်းစားစရာက ASIAN Free Trade က ကျွန်တော်တို့ကို ဘယ်လောက်ထိ အကျိုးဖြစ်ထွန်းစေမှာလဲ ဆိုတာပဲ။
တကယ် အကျိုးရရင်ကော ဘယ်သူတွေခံစားကြရမှာလဲ။ အဲဒီ Free Trade ကိုအရင်ဆုံး ကျွဲပခုံးထအောင် ခံရမယ့်သူတွေက ဘယ်သူတွေလဲ
ဆိုတာ နည်းနည်းတော့ ပြောရခက်မယ်ထင်တယ်။

လာတုန်းကတော့ အတည်ပေါ့။ အားလုံးကို တာဝန်ယူနိုင်ပါတယ်ပေါ့။ ဟုတ်ပါတယ်...ဒီကလည်း သိပ်သဘောကောင်းဆိုတော့ ဘဝတစ်ခုလုံး ပုံပေးတယ်။
မွေးလည်း မွေးလာရော..."ကလေးကိုပေး၊ နင့်ကို အငှားကိုယ်ဝန်ဆောင်ခိုင်းတာ" တဲ့။

တကယ်တော့ ကျွန်တော်တို့ မြန်မာနိုင်ငံဟာ ကိုယ်ဝန်အငှားဆောင်ပေးနေရတာပါ။

မြတ်ကျော်သူ

Monday, May 14, 2012

Poem


လူအတုရဲ့ရေစိုအတောင်များ

လူဖြစ်ချင်ယောင်ဆောင်ထားတဲ့
လူအတုတွေနဲ့
နေ့စဉ်လူလုပ်တမ်း ကစားနေကြရ…

လူမဖြစ်သေးခင်မှာပဲ
အဲဒီလူတွေရဲ့
ဖြော့တော့တော့ လူ့ယဉ်ကျေးမှုအကြောင်း
သင်ကြားပေးခြင်းခံရ…

ကိုယ့်ဖြစ်တည်မှု ကိုပြန်ရှာနေချိန်
လူမှုရေးသားကောင်ဖြစ်ဖို့
လူဖြစ်ချင်ယောင်ပြန်ဆောင်ရ…

မဖြစ်စလောက်ရပ်တည်မှုအတွက်
တွန်းပို့ကြ၊ ဆွဲချကြ၊
မိုက်မဲကြ၊ တိုက်ခိုက်ကြ…

ကျဉ်းထဲကျပ်ထဲက မိုးခါးရေတွေ
တစ်ခြားသူတွေကို
အဓမ္မ သောက်...ခိုင်း...ကြ...ရင်း…

နောက်ဆုံး
ပျံလို့မရနိုင်တဲ့ ရေစိုအတောင်တွေ
ကိုယ့်ကိုယ်ကို ပြန်အမေ့ခံဖို့
ကိုယ့်ကိုယ်ကို ပြန်တပ်ဆင်ပေးကြ…

မြတ်ကျော်သူ
12:41 AM,
Thu 19, April, 2012

Friday, May 4, 2012

ဂလိုဘယ်လိုက်ဇေးရှင်း နှင့် နှလုံးသား နိုင်ငံရေး

အမေရိကန်လက္ခဏာဆရာ ကပြောတယ်...
မင်းနှလုံးသား ဆန်ရှင်လုပ်ခံထားရတယ်တဲ့...
နိုင်ငံခြားသားနဲ့အိမ်ထောင်ပြုရင် တော့ ကြီးပွားမယ်...
ခြေနှစ်ချောင်း မကယ်ကောင်းဘူး...

ဘယ်လိုပဲဆိုဆို...
ငယ်ချစ်ဟောင်းကွန်မြူနစ်လေးကိုတော့...
တစ်ခါတစ်ခါ လွမ်းမိတယ်...
တစ်ခါတစ်ခါတော့လည်း...
နောက်အိမ်ထောင်ပြုသွားတဲ့ ဆိုရှယ်လစ်ချစ်သူနဲ့...
လမ်းမှာဆုံရင် ပြုံးပြမိတယ်...

အိမ်နီးချင်းတွေကတော့ အားပေးတယ်...
ချီတက်တဲ့...
သူတို့လည်း မကြာမကြာလာမယ်...
အနောက်အိမ်ကလည်း တစ်ခါတစ်ခါတော့...
လှမ်းလှမ်းဆဲကြတယ်...

အသဲကွဲခဲ့တာ နှစ် ၂၀ ကျော်လောက်ကြာနေတော့လည်း...
တစ်ခါတစ်ခါ ဗုံးကွဲရင် 

ရင်တွေ ဘာတွေ ခုန်နေရတုန်း...
တစ်ခါတစ်ခါ ငြိမ်းချမ်းရေးဆိုတဲ့အသံကြားရင်...
သံတိုင်တွေကိုပြေးမြင်တယ်...

ဆင်စွယ်နန်းပေါ်က ကောင်မလေးလား...
အပျိုကြီးလား မသိရပေမယ့်...
ခိုးခိုကြည့်မိနေတဲ့ တစ်ယောက်တော့ရှိတယ်...
သူများတွေပြောပြောနေတာတော့ 

ကြား,ကြား နေရတယ်...
နည်းနည်းတော့ မေတ္တာထားရတော့မလို...

အဲဒီ(ခိုးခိုးကြည့်နေရတဲ့)  တစ်ယောက်ကို...
သူ့" အမေ" ဆိုတဲ့အမျိုးသမီးကြီးတစ်ယောက်က...
နည်းနည်းရိုက်နှက်ဆုံးမ နေသံတော့ကြားတယ်...

ယက္ခ၊ ဂုဏ် မာန်တွေကြားက 

အဲဒီကောင်မလေး...
နည်းနည်းတော့ ကြောက်မိတယ်...
သူက တစ်ခါတစ်ခါ 

ဘဘကြီးကိုကြောက်ရသေးတယ်...တဲ့

အဲကောင်မလေး နာမည်...
ဟိုနေ့က သိလိုက်ရတယ်...
ဘာတဲ့...ဒီမိုကရေစီ..ဆိုလား...
သဲသဲကွဲကွဲတော့ မဟုတ်သေးဘူး...
ခုန်နေကျ ရင်က မရပ်နိုင်ဘူး....

မြတ်ကျော်သူ
၂၃.ဒီဇင်ဘာ.၂၀၁၁
၅:၄၄ မိနစ်(ညနေ)